Нацо Јовчевски, член на Президиумот Макби, е меѓу осумте производители од цел свет кои ќе го означат официјалното отворање на Меѓународниот саем за традиционална храна Тера Мадре Салоне дел Густо 2016 во Торино.
Церемонијата ќе почне попладнево од Паркот Валентино со огромна парада на присутните 7.000 делегати од вкупно 140 земји. Секоја делегација ќе биде предводена од знаменосец, а на чело на македонската поворка ќе биде Јовчевски со македонското знаме.
Парадата ќе помине низ историскиот дел на Торино каде што се поставени павиљоните на Слоу фуд, покрај реката По, преку плоштадот Виторио Венето, се до Кралската палата.
По пристигнувањето пред театарот Карињано, осумте избрани производители од цел свет меѓу кои и Јовчевски, на специјално поставена бина симболично ќе разменат свои производи, автентични за поднебјето од каде доаѓаат. Јовчевски ќе понесе мед во саке од македонската автохтона пчела.
На отворањето на Тера Мадре ќе присуствуваат италијанскиот претседател и министерот за земјоделство и храна на Италија, како и основачот на Слоу фуд Карло Петрини. Уште еднаш ќе биде испратена пораката дека биодиверзитетот може да ја спаси Планетата. Затоа мотото на саемот годинава е „Сакај ја Земјата“.
Во македонската делегација што ја предводи Слоу фуд Македонија покрај производителите се и готвачи, млади активисти и експерти.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
