Полскиот нуркач Кшиштов Старнавски се спушти на длабочина до 230 метри во подводната пештера Врело на Матка, со што го собори досегашниот рекорд од 212 метри. Старнавски во текот на вчерашниот ден во придружба на својот тим и со логистичка поддршка од страна на нуркачите од клубите „Врело“ и „Акватек“ успеал по повеќе од пет часа да се спушти на оваа длабочина.
– Со 230 метри длабочина го урнавме рекордот. Експедицијата започна со подготовки на теренот, проверка на сите перманентни линии во пештерата и координација на тимот. Пештерата понатаму се гледа дека отвора подлабоко, но тоа го оставаме за следната експедиција – рече Старнавски, изразувајќи надеж дека следната година повторно ќе ја посети пештерата Врело.
Полјакот нуркаше со специјален систем за подводно пливање со кој нуркачите може значително подолго да се задржат под вода. Досегашниот рекорд го држеше италјанскиот нуркач Луиџи Казати, кој во 2010 се спушти до 212 метри.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
