Градоначалникот на Град Скопје, Коце Трајановски, заедно со екипи на Градот Скопје и на јавните градски претпријатија, денеска, 9 август, е во посета на населеното место Инџиково каде што е во тек акцијата за расчистување на последиците од катастрофалното невреме што пред три дена го зафати Скопје. Во Инџиково денеска се распределуваат пумпите што ќе ја извлечат насобраната вода од поплавените подруми и од дворовите на жителите.
– Во моментов се распределуваат околу 100 пумпи што ќе црпат вода од поплавените подруми и дворови во населеното место Инџиково. Во текот на денот очекуваме да пристигнат уште 250 пумпи, со што во Инџиково во функција ќе бидат ставени 350 пумпи за помош на граѓаните. Во текот на вчерашниот ден, овде работеа големите пумпи на Противпожарната бригада кои од колекторите ја исфрлаа водата во каналот во Инџиково. Каналот е веќе расчистен со механизација и ќе може да ја прифати извлечената вода од овие 350 пумпи што ќе ги расчистуваат поплавените подруми и дворовите на жителите на Инџиково. Денеска и утре очекуваме да бидат испразнети сите поплавени простории во Инџиково – рече денеска градоначалникот Трајановски.
Трајановски додаде дека и во населените места Синѓелиќ и Стајковци ќе бидат распоредени по 350 пумпи.
– Денеска во функција ќе бидат ставени вкупно 1.000 пумпи на подрачјето на загрозените населени места, обезбедени од Владата на Република Македонија. Значајно е и тоа што со секоја пумпа ќе раководи по еден војник што ќе помогне во расчистувањето на просториите – нагласи градоначалникот Коце Трајановски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
