Детската болница во Козле доби нов апарат спирометар, кој е донација од Цементарница „Усје“ а.д. Скопје.
Директорот на Детската болница во Козле, Оливер Зафировски денеска се заблагодари за донацијата, која, како што рече, е од големо значење за децата. Посочи дека новиот апарат ќе претставува уште една придобивка во зголемување на квалитетот на инвазивниот метод со кој ќе се мери функцијата на детските бели дробови.
– Тоа значи подобра и точна дијагноза, соодветен третман и подобрување на квалитетот на животот на сите деца во Република Македонија – истакна Зафировски.
Одговарајќи на новинарско прашање рече дека во последните денови сите деца што имаат алергиско заболување се дел од нивната програмата и тие перманентно ги следат.
– Алергиите се зголемуваат и на светско ниво. Нема човек што немал некоја алергиска манифестација. Токму затоа овој апарат е од извонредно значење бидејќи можеме да ја следиме функцијата на белите дробови и ќе помогне во нашата точна дијагноза. Компликациите кај алергиите ако не се постави навремена дијагноза се создавање услови да се појави ХОББ – Хронична опструктивна белодробна болест, астма.. – додаде Зафировски.
Магдалена Славејкова, претставник од Цементарница „Усје“ а.д. Скопје, изјави дека се горди затоа што идејата за донацијата произлегла од вработените во таа компанија, кои на тој начин со својот волунтаризам и со својата грижа за заедницата придонеле за набавка на апаратот.
– Набавката на овој апарат е најдобар начин за заокружување на првата етапа од нашата акција „На работа без автомобил“. Од тие собрани средства беше набавен апаратот и на тој начин се постигна да се покаже колку вработените се грижат за сопственото здравјето, за здравјето на заедницата и за животната средина – додаде Славејкова.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
