Со последните 15 натпревари, синоќа заврши регуларниот дел од сезоната во НБА. ЛА лејкерс се избори за настап во плејофот, а по победата над Хјустон се најде на 7. позиција во западната конференција и во првата рунда од доигрувањето ќе игра против Сан Антонио. Најдобар стрелец во Лигата е Кармело Ентони, Мајами е прв на истокот, Оклахома ќе стартува од првото место во доигрувањето во западната конференција, а дерби е пресметката меѓу Њујорк и Бостон.
Лејкерс и без Коби Брајант се пласира во завршницата. Синоќа по продолжение го победи Хјустон со 99-95. Стив Блејк беше најефикасен со 24 поени кај гостите. Клучен за успехот беше блокот Двајт Хауард за Џејмс Харден во последните моменти од продолжението. Центарот на Лејкерс даде 16 поени, комбинирани со 18 скока, а Пау Гасол имаше сличен ефект со 17 поени и 20 скока. Кај Хјустон Харден постигна 30 поени и беше најефикасен кошаркар на мечот.
Последната рунда беше искористена за одмор на главните ѕвезди во тимовите, кои веќе имаа обезбедено место во завршницата. Кармело Ентони не играше, но ја освои титулата најдобар стрелец во НБА сезонава. Кевин Дурант требаше да даде 70 поени за да го престигне, но тој воопшто и не играше за Оклахома.
Денвер го победи Феникс со 118-98 и ја задржа третата позиција, што носи предност од еден меч повеќе на домашен терен, во серијалот „кој прв до 4 победи“ со Голден стејт. Со победа, регуларниот дел од сезоната го заврши и нивниот противник Голден стејт. Вориорс беа подобри од Портланд со 99-88. Стефон Кари го урна рекордот на Реј Ален, со 272 тројки во една сезона во НБА, а Голден стејт по шест години пауза ќе бие битка за титулата.
Рекорд од 32 победи на домашен терен прокнижи и Мемфис. Со триумф од 86-70 тие ја елиминираа Јута од плејофот. Гризлис ќе играат против Лос Анџелес клиперс во првата рунда, како реприза на ланската сезона. Тогаш Клиперс беше поуспешен и се пласира понатаму.
На истокот од Лигата, Мајами има најдобар скор со 66 победи и само 16 порази. Леброн Џејмс не беше на паркетот во последниот дуел со Орландо, но и без него Хит славеше со 105-93. Со тоа екипата го урна клупскиот рекорд по бројот на победи во еден циклус, а прв противник на патот кон одбрана на титулата ќе им биде Милвоки.
Њујорк е второпласиран, местото го потврди со триумф над Атланта со 98-92. Со тоа Никс си закажа дерби на првото коло на истокот, против седмопласираниот Бостон. Тие в сабота на 20 април ќе го почнат плејофот во НБА. Атланта ќе гостува кај Индијана, а во последната пресметка во оваа конференција, Бруклин ќе ја има предноста на домашен терен против Чикаго.
Двојки за првото коло од плејофот:
Источна конференција: Мајами – Милвоки, Њујорк – Бостон, Индијана – Атланта, Бруклин – Чикаго.
Западна конференција: Оклахома – Хјустон, Сан Антонио – ЛА лејкерс, Денвер – Голден стејт, ЛА клиперс – Мемфис.
Резултати: Шарлот – Кливленд 105-98, Чикаго – Вашингтон 95-92, Далас – Њу Орлеанс 99-87, Бруклин – Детроит 103-99, Торонто – Бостон 114-90, Сан Антонио – Минесота 95-108, Индијана – Филаделфија 95-105, Мајами – Орландо 105-93, Њујорк – Атланта 98-92, Мемфис – Јута 86-70, Денвер – Феникс 118-98, Оклахома – Милвоки 89-95, Портланд – Голден стејт 88-99, Хјустон – ЛА лејкерс 95-99 (продолжение), Сакраменто – ЛА клиперс 108-112.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
