Вкупно 10.750 работни места во 5.200 приватни компании се отворија изминатава година преку мерката за вработување млади до 29 години, рече денеска заменик министерот за труд и социјална политика, Диме Спасов, по посетата на приватната штипска компанија „Кит-Го“.
Токму „Кит-Го“, истакна Спасов, со вработени 151 младо лице, е успешен пример за искористување на владината мерка која предвидува една година ослободување од социјални придонеси и персонален данок, како и дополнително уште една година обврска за задржување на младите на работа. Мерката за вработување млади продолжува да трае до средината на март 2016 година .
-На ниво на Штип, во изминатава година и неколку месеци, само преку оваа мерка во приватните компании досега се вработија околу 930 млади лица, користејќи ги поволностите за вработување до 29 години – напомена Спасов.
Тој ги повика сите заинтересирани приватни компании да ги искористат поволностите на оваа мерка и да направат значителна заштеда за отворање нови работни места, средства кои, како што подвлече, ќе ги наменат за развој на бизнисот и кои ќе помогнат за раздвижување на економијата.
Градоначалникот Илчо Захариев, кој беше во придружба на министерот Спасов, додаде дека политиките за вработување на Министерството за труд овозможија бројот на невработени во општина Штип да биде најмал. Штипскиот бизнис знае да реагира на добрите политики и на стимулациите што ги дава Владата, оцени Захариев.
Изразувајќи задоволство од бенефициите од мерките за вработување млади, сопственикот на команијата „Кит-Го“, Кире Гогов, рече дека дел од овие средства што ги нуди државата за приватните компании како ослободителни се користат за инвестиции и за зголемување на платите на вработените. Со Спасов и со Захариев во посета на компанијата беше и пратеникот Трајчо Димков.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
