Учесниците на самитот ЕУ-Турција посветен на миграцијата, што заврши синоќа во Брисел, постигнаа договор за начините за надминување на бегалската криза, пренесе МИА.
На заедничката прес-конференција по завршувањето на самитот, претседателот на Европскиот совет, Доналд Туск, првиот човек на Европската комисија, Жан-Клод Јункер и турскиот премиер, Ахмет Давутоглу, соопштија дека на средбата е утврден Акциски план за соочување со проблемот со мигрантите.
Со планот се предвидува Анкара да добие три милијарди евра за потребите на бегалците сместени во камповите во Турција, сума која би можело да биде дополнително зголемена ако за тоа има потреба. За возврат Турција се обврзува да го запре приливот на имигранти од нејзина територија кон Европа.
По завршувањето на средбата, германската канцеларка Ангела Меркел информира дека со „лидерите на некои земји-членки на ЕУ“ разговарала за прифаќање на дел од бегалците што сега се наоѓаат во Турција, но не посочи за кои држави станува збор.
Јункер, од своја страна, на прес-конференцијата најави дека до 15 декември Еврокомисијата ќе подготви план за прераспределба на дел од мигрантите од Турција на територијата на ЕУ.
– Тоа ќе се прави на доброволен принцип и планот ќе биде изработен врз основа на предлогот на Германија. Досега таквиот план има поддршка од осум членки на ЕУ, додаде Јункер.
Давутоглу соопшти дека на средбата е договорено на 14 декември во Брисел, Турција и ЕУ да започнат преговори по Главата 17 од договорот за членство, која се однесува на економски и на финансиски прашања.
– Среќен сум што можам да видам дека сите мои колеги во Европа се согласуваат дека Турција и ЕУ имаат заедничка иднина, потенцира Давутоглу, додавајќи дека зачленувањето на Анкара во Унијата е „во интерес не само на ЕУ и на Турција, туки и на светскиот мир“.
Тој најави дека очекува следната година да завршат и преговорите за укинување на визниот режим за патување на турските граѓани во земјите-членки на ЕУ.
– Визите за турските граѓани би можеле да бидат укинати во текот на есената 2016 година – додаде Јункер.
Тој изрази уверување дека денешниот Самит претставува возобнова на билатералните односи меѓу ЕУ и Турција на високо ниво и дека ќе обезбеди заеднички одговор на бегалската криза.
Говорејќи за мигрантскиот прилив, Давутоглу оцени дека ЕУ и Турција се „жртви на несупехот на системот на ОН да ја реши кризата во Сирија“, алудирајќи на ветата што ги ставија Русија и Кина на резолуциите поврзани со сирискиот конфликт во Советот за безбедност на Светската организација.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
