Синоќа во Европа започна новата и долга сезона во кошаркарската Евролига. Фаворитите во првите шест натпревари ги остварија првите победи и веднаш уште на стартот се издвојуваат според квалитетот.
Единственото изненадување го приреди Пинар Каршијака, која на домашен паркет сосема заслужено славеше победа над гигантот Барселона со 71-62.
Турците одлично ја поставија играта и ги затворија приодите кон својот кош, играјќи фантастична одбрана против екипа која има одлични офанзивни квалитети. Клучен период на натпреварот беше третата четвртина во која домашната екипа конечно го скрши отпорот на „каталонците“ и направи недостижна предност (25-11).
Македонскиот стратег на клупата на Дарушафака, Октај Махмути ја забележа првата победа откако славеше над италијанскиот тим Сасари со 83-74. До победата екипата на Махмути стигна дури по продолжение од пет минути откако натпреварот во регуларниот дел заврши 66-66 во дполнителните пет минути Дарушафака конечно успеа да го скрши отпорот на противникот, па неговиот тим го прослави победничкото деби во елитното европско натпреварување. Бјелица постигна 15, а Слотер 10 поени за тимот на Дарушафака, додека Прелџиќ го заврши мечот со седум поени, седум скокови и осум асистенции.
Во натпреварот што требаше да биде дерби, ЦСКА Москва го демолираше Макаби со победа од 31 разлика (100-69). ЦСКА уште во првото полувреме си создаде одлична предност од 44-29, по што немаше дилеми околу победникот на овој меч, со оглед на очајната шутерска вечер на гостите од Израел. Де Коло беше главна фигура на мечот со 17 поени, два повеќе од Милош Теодосиќ.
Резултати: Пинар Каршијака – Барселона 71-62, Црвена Звезда – Стразбур 81-59, ЦСКА Москва – Макаби Тел Авив 100-69, Дарушафака – Сасари 83-74, Олимпијакос – Цедевита 76-61, Уникаха – Бросе Баскет76-71.
Вечерва своето враќање во Евролигата ќе го има и поранешниот македонски репрезентативец Перо Антиќ кој со својот нов тим Фенербахче е апсолутен фаворит во дуелот против Баерн Минхен на домашен терен.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
