Се појавија чудни имиња на циклони, најави за „потоп“ и 400 литри дожд на Балканот за време на претстојниот викенд, токму на социјалните мрежи, и истите беа проследени на поголем број на електронските медиуми. Целата ситуација од почеток до крај, односно од прогнозата, преку именување на циклоните, па до пренесување на најавата во медиумите е погрешна, пишува специјализираниот портал за временска прогноза Метеопро.мк, а во текстот го приложува следното објаснување зошто објавените информации за „потоп“ се лажни:
Да тргнеме со ред:
НЕ СЕ ОЧЕКУВА 400 ЛИТРИ ДОЖД НА m²!
Овој медитерански циклон кој е уште еден сосема нормален циклон, без некои истакнати особености кои би требало да нé плашат, ќе „истури“ поголема количина на дожд на Балканот, но најзафатени подрачја ќе бидат југот на Далмација, како и Јонското крајбрежје на северот на Грција и југот на Албанија. Но, ниту во овие региони нема никаква теорија да наврнат 400 l/m² воден талог. Се очекува колучина нешто над 100 l/m², и истата може да биде пролематична во тие краишта, особено ако се зема во предвид природниот „блок“, планините токму во непосредна близина на крајбрежјето. Можни се сливови по падините и појава на свлечишта, но од помали размери, бидејќи станува збор за планини кои низ векови се на удар на вакви ситуации, па само гола карпа е останата на нив. Низ градовите во споменатите региони се можни краткотрајни порои (буични поплави).
Но, од истата ситуација кај нас ние очекуваме околу 50 l/m² наврнат дожд во текот на сабота и недела. Дождот повремено, особено во ноќта сабота кон недела, ќе има локален пороен карактер. Оваа ситуација не е засега проблематична, особено ако се земе во предвид дека летото беше сушно и дека почвата има капацитет да прими количина на вода.
Втор битен момент е што очекуваните количини на дожд се за период од 36 часа. Тоа е олеснителна околност бидејќи нема да има полнење на планинските текови. Помали излевања на планинските водотеци не се исклучени, но оваа нема да влијае на големите водотеци во земјава. Од целата состојба може позитивно да биде што ќе се наполнат акумулациите, па ќе можеме да имаме домашна струја добиена на „еко“ начин.
Именувањето на циклони е сосема погрешно. Дури во случајов е наведено некакво име Димитар, па следел Кристијан… Ова не вреди ни да се коментира, но ако сакате подетални информации за тоа кој и како именува циклони, клик на следниот линк.
И, да се знае: УХМР е онаа која што е авторитетот која во државава издава вонредни метеоролошки прогнози!
Што се однесува до метеопро.мк, ние секогаш ќе продолжиме да известуваме реално, без паника и потреба од сензационализам.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
