Владата инвестира 1,5 милиони евра за чистење на реката Црна и каналите

Владата почна со чистење на реката Црна за што се инвестираат околу половина милион евра, а дополнително ќе се инвестираат еден милион евра за чистење на каналите на потегот Битола – Новаци – Могила, истакна денеска премиерот Никола Груевски, кој е во посета на Пелагонскиот регион.Тој посочи дека се работи на целиот потег на реката Црна којшто е критичен и оти ќе бидат доделени и дополнителни 300 тони нафта за механизацијата која работи на терен.

– Работиме со внимание за овој проект којшто ветивме дека ќе го направиме. Механизацијата е на терен и се работи со полна пареа. Средствата се обезбедени и нема никаква пречка за оваа работа да не ја завршиме, изјави Груевски – одговарајќи на новинарско прашање.

Тој додаде дека минатата година се исчистени 145 километри канали, а годинава дополнителни 85 километри.

Премиерот информира дека почнато е и обештетувањето на земјоделците и оти веќе во 13 општини околу 2.220 земјоделски семејства се обесштетени.

– Преостанува понатамошното исплаќање на земјоделците кои не ги примиле средствата заради обработка на документите за исплата. Во општините Могила, Новаци и Битола досега е исплатено обештетување на околу 985 семејства, а исплатата продолжува и понатаму- рече Груевски, изразувајќи надеж дека за месец до два треба да се заокружи овој процес.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.