Осомничениот за убиство на новинарката и снимателот на американската телевизиска мрежа Даблју-Ди-Би-Џеј Севн (WDBJ7), Вестер Фланаган, почина денеска во болница во Вирџинија, објави „Вашингтон пост“, цитирајќи полициски извори.
Флананган (41) пукал во себе и се здобил со тешки повреди, по полициската потера покрената откако тој за време на интервју во живо отворил оган кон новинарката, снимателот и локалната функционерка, која ја интервјуирале.
Полицијата во Вирџинија соопшти претходно дека за време на потерата осомничениот Фланаган доживеал сообраќајна несреќа, откако со автомобилот излетал од патот и е пронајден со прострелна рана.
Трагедијата се случила рано изутрината по локално време, во трговскиот центар во местото Бедфорд, кога се слушнале пукотници од огнено оружје по што новинарите и нивните соговорници се обиделе да се скријат.
Телевизијата Даблју-Ди-Би-Џеј Севн (WDBJ7) јави дека е убиена новинарката Алисон Паркер (24) и камерманот Адам Ворд (27), а дека интервјуираната извршна директорка на стопанската комора на областа „Смит Маунтин Лејк“ Вики Гарднер е погодена во пределот на грбот и е хоспитализирана.
Убиството буквално во живо беше прикажано на телевизијата, за која работеа новинарите. Додека репортерката ја интервјуирала Гарднер одекнаа најмалку осум истрели и камерата на нејзиниот колега паднала на земја. Таа продолжила да работи и ги снимила нозете на напаѓачот, како и последните врисоци на новинарите.
Претходно денеска гувернерот на американската сојузна држава Вирџинија Тери Маколиф изјави дека осомничениот убиец на двајцата новинари од локалната телевизија, кои беа застрелани при директен пренос, бил идентификуван.
Тој истакна дека не станува збор за терористички напад, туку за кривично дело.
Фланаган, кој исто така работел во телевизијата како репортер една година користејќи го псведонимот Брис Вилијамс, претходно е отпуштен иако причините се уште не се познати.
Во текот на денот Фланаган на својот налог на Твитер под својот псевдоним ги објавил снимките на кои се гледа како на настраданите им приоѓа од зад грб и го насочува пиштолот кон нив.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
