Три мобилни екипи со три возила и 12 волонтери на Црвениот крст на град Скопје и денеска патролираат низ улиците на Скопје од 11 до 17 часот и ќе поделат околу 1.500 шишиња со вода на минувачите.
Веќе неколку години, Црвениот крст на град Скопје активно се вклучува со превентивни и теренски активности во насока на заштита на населението од топлотниот бран, кој ја зафаќа државата во летниот период. Активностите, соопшти Град Скопје, се координирани со Црвениот крст на Република Македонија, Министерството за здравство и Градот Скопје и Центарот за управување со кризи.
Активностите на тимовите на Црвениот крст на град Скопје беа поделени во два дела-теренски активности и дежурства на СОС линијата. Во рамки на теренските активности, обучени волонтери и лекар, со возила на Црвениот крст патролираа по најфреквентните локации во нашиот град, делеа вода и флаери за граѓаните со совети како да се заштитиме од топлотниот бран.
Во рамките на теренските активности на неколку пунктови, се вршеше мерење на крвен притисок на граѓаните кои се пожалија на здравствени потешкотии, а беше организиран и транспорт за постари лица и хронично болни кои побараа помош од екипите на Црвениот крст.
За активностите во овој период, ангажирани беа 40 волонтери од Тимот за одговор при катастрофи, 10 волонтери од Тимот за спасување на планина и пет возила од кои три ќе патролираат низ градот, а две за време на викенди ќе бидат дежурни на планинско спасителните станици Водно и Матка.
Тимот за спасување на планина при Црвен крст на град Скопје, како и секоја година, така и оваа активно се вклучува во активностите околу превенирање и намалување на штетите предизвикани од топлотниот бран и појава на пожари на отворено. Волонтерите од тимот, преку делење пропаганден материјал во овој временски период се обидуват да влијаат на свеста на граѓаните и нивните навики кога се движат низ планинските предели, а во соработка со Шумска полиција и ЈП „Паркови и зеленило”, од 1 јуни до 31 август ќе бидат активни во давање совети на граѓаните како да се заштитат од топлотниот бран и да им укажат прва помош доколку е потребно.
Дваесет тимови на волонтери од Тимот за одговор при катастрофи во текот на јуни и јули на територијата на град Скопје досега поделиле 7.000 шишиња со вода, односно 3.500 литри вода. За помош се обратиле 70 лица од кои четири лица се пренесени до нивните живеалишта.
Во рамки на Здравствениот акциски план за топлотни бранови, кој е на ниво на Министерството за здравство, веќе неколку години функционира СОС линија за топлотни бранови, чија главна цел е да дава информативни совети во однос на превенирање здравствени последици кои може да јавуваат како последица од високите температури. Линијата 02 32 21 902 функционира на рамки на Црвениот крст на РМ-Црвен крст на град Скопје. На линијата секој работен ден од 10 до 18 часот има дежурни волонтери, кои поминале обука за давање совети и корисни информации на граѓаните поврзани со превенција од евентуални несакани последици по здравјето, како и превентивни совети.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
