Од утре почнува ограничувањето за пловидба на скутери и на чамци по водите на природните езера во Македонија. Забраната за движење е до 31 август, во периодот од 11 до 19 часот низ Охридско, Преспанско и Дојранско Езеро. Чамците, пак, не смеат да пловат по езерските води од 21 до 5 часот.
Првиот човек на Капетанијата, Горан Устијаноски, најави промени околу движењето на пловните објекти, но за тоа конкретно откако ќе заврши обележувањето.
– По обележувањето ќе следат промени во режимот на пловидба, но конкретно ќе се знае кога ќе заврши обележувањето – изјави Устијаноски за МИА.
Ограничувањата за пловидба на скутерите, според него, се за безбедност на капачите и на учесниците во пловидбата. За непочитување на одлуката предвидена е глоба од 800 евра, но Устијаноски нагласи дека прво ќе постапуваат едукативно и превентивно со советување.
– Постојат прекршоци за кои веднаш можеме да издадеме забрана, веднаш да санкционираме, но постојат некои недостатоци каде можеме да посоветуваме, да дадеме рок до кога може да се средат отстранат недостатоците. Доколку тој рок не се испочитува, тогаш стапува во сила забрана за пловидба, но ако се продолжи со пловење и понатаму, се изрекува и глоба – појасни Устијаноски.
Од безбедносни причини, ноќе ќе биде забрането пловењето на чамците по езерските води.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
