Г7 – Санкциите спрема Москва зависат од примената на договорот од Минск

Лидерите на Г7 предупредија денеска дека се подготвени да ги заострат или да ги олеснат санкциите спрема Москва во зависност од нејзината понатамошна улога во украинската криза, а на Грција и порачаа дека времето за постигнување договор за кредитирање истекува.Во делот на заедничката декларација посветена на надворешната политика, лидерите на Г7 исто така истакнаа значење за нуклеарна безбедност, безбедност на море, поддржаа процеси на ОН во изнаоѓање мировни решенија за ситуацијата во Сирија, Јемен и Либија и изразија загриженост поради порастот на бројот на бегалци и случаите на трговија со луѓе во светот.

Тие повторија одлучност да се борат против тероризмот посебно спрема ИД и против оние кои финансираат тероризам.

По завршувањето на дводневниот самит, лидерите на Г7 наведуваат дека ќе ги повлечат санкциите спрема Русија доколку мировниот договор биде спроведен, но остануваат подготвени да преземат понатамошни рестриктивни мерки доколку преземе нови акции.

Британскиот премиер Дејвид Камерон рече дека постоечките санкции спрема Русија мора да останат во сила додека договорите од Минск не бидат во целост применети, а тоа „подразбира акции на Москва и на Минск“.

Францускиот претседател Франсоа Оланд нагласи дека моментно нема причини за укинување на санкциите за Москва и додаде дека тие ќе останат најверојатно до крајот на 2015 година.

На затворањето на самитот, германскиот канцелар Ангела Меркел рече дека на Грција не останало многу време да обезбеди договор со кој ќе се одблокираат милијарди евра спасоносни за таа држава.

Таа нагласи и дека Г7 се посветени на ограничување на порастот на глобалните температури на два Целзиусови степена во споредба со нивото пред индустријализацијата.

Дводневниот саммит беше одржан во баварскиот суперлуксузен дворец Елмау, близу Гармиш-Партенкирхен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.