ССК: Нестабилноста во државата може да има поразителни резултати врз бизнисот

-За бизнис-секторот секоја нестабилност во државата, било да е таа политичка или не, не е добра и може да има поразителни резултати врз економијата – изјави денеска претседателката на Сојузот на стопански комори на Македонија Данела Арсовска.

Одговарајќи на новинарско прашање по потпишувањето на меморандумот за соработка со Македонската академија на науките и уметностите, Арсовска рече дека доколку политичката криза се провлече на подолг рок тогаш последиците можат да бидат поразителни.

–  Најважно е тоа дека во ситуација на криза проектите ќе останат во фиоките и никој нема да пристапи кон развојните компоненти – рече Арсовска.

Таа нагласи дека економијата е жива материја којашто зависи не само од актуелните случувања во бизнисот, туку и од актуелните случувања во политиката.

– Во овој момент не можеме да кажеме ништо повеќе освен дека во овој случај не е добра политичката нестабилност во државата и дека нe би сакале да бидеме оние кои ќе ги видат негативните резултати во периодот којшто следува – додаде Арсовска.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.