ЦСКА и Фенербахче пред пласман на фајналфор турнирот во Евролигата

Екипите на ЦСКА Москва и Фенербахче извојуваа убедливи победи во четвртфиналната серија од Евролигата и со водство од 2-0 над своите противници се наоѓаат на чекор до завршниот турнир во Евролигата.

ЦСКА буквално го торпедираше Панатенаикос во вториот натпревар одигран во Москва во серијата подобар до три победи со 100-80. Моќниот тим на „армејците“ уште од самиот старт на натпреварот покажаа зошто се вбројуваат во најтесниот круг на екипи за освојување на овогодинешната Евролига.
Уште во првата четвртина повратникот во екипата Андреј Кириленко со три тројки од истотолку обиди ги сруши надежите на гостите од Атина за некаква сензација и го одведе својот тим на полувремето со предност од 12 разлика (47-35).
Во второто полувреме предноста на ЦСКА само се зголемуваше за да во четвртиот период достигне и високи 28 разлика.
Сони Вимс постигна 20 поени, а по 16 поени зад своите имиња запишаа Нандо Де Коло и Андреј Кириленко.

Фенербахче за разлика од првиот натпревар во кој извојува тешка победа со пресврт во четвртата четвртина, на синоќешниот натпревар влезе крајно мотивирано и од самиот почеток дојде до предност од 16 поени разлика (30-14) која рутински ја сочува за победа од 82-67 и водство од 2-0 над актуелниот европски шампион Макаби Тел Авив.

Избраниците на Жељко ОБрадовиќ во текот на второто полувреме имаа и предност од 22 поени, а Макаби не успеја ниту да се доближи за да го направи финишот од мечот поинтересен. Ендрју Гаудлок со 19 постигнати поени беше расположен во редовите на Фенербахче.

Следните натпревари се играат в понеделник на терените на Панатенаикос и Макаби.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.