Екологисти ја чистеа реката Лепенец

Светскиот ден на водите беше одбележан со акција за прекугранично чистење на речното корито на реката Лепенец. Од македонска страна во акцијата се приклучи министерот за животна средина и просторно планирање Нурхан Изаири, а од косовската страна заменик министерот за животна средина Ферат Шала и градоначалниците на Качаник, Витина, Урошевац и Генерал Јанковиќ.

Екологистите упатија порака дека за заштита на заедничките природни добра потребна е соработка и координација на активностите на владините институции, но и на локалните самоуправи и локалното население.

– Еден од приоритетите на Владата на Република Македонија, а пред се на Министерството за животна средина и просторно планирање во областа на животната средина, е заштита на водните ресурси и интегрирано управување со речните сливови за што се неопходни заеднички, осмислени и планирани активности и мерки на сите државни, јавни и невладини организации, но и добра прекугранична соработка бидејќи само на тој начин можеме да оствариме одржив развој на речните системи кои ги споделуваме – изјави македонскиот министер Изаири.

Тој додаде дека Министерството има воспоставено добра соработка со државите со кои македонија дели заеднички природни добра, а потврда за тоа се активностите за заштита на Дримскиот Басен, Преспа Паркот, заштитата на Охридското Езеро и заштитата на реката Лепенец.

Аакцијата е дел од проект поддржан од Европската комисија, а чии партнери се граѓански асцијации од Албанија, Косово, Македонија, Србија и Турција. 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.