Заштитата на црквата „Св. Ѓорѓија“ во преспанското село Курбиново, која е прогласена за споменик на културата уште од 1952 година како едно од врвните остварувања на источнохристијанската култура, е еден од приоритетите на Министерството за култура.
Според проектот, стручните екипи на Заводот за заштита на спомениците на културата и музеј – Битола во изминатиот период извршија геотехнички и физичко-механички истражувања за конструктивна консолидација на црквата „Св. Ѓорѓија“.
Паралелно со истражувачките работи на конструктивниот систем, се реализираа и истражувачки работи на ѕидното сликарство со цел да се утврдат техниката на сликање, видовите и распространетоста на оштетувањата, како и нивните причинители. Направени се и дополнителни физичко-хемиски анализи на живописот од горните зони во црквата.
Во изминатиот период е изготвен и проект за конзервација на фрескоживописот и проект за изработка на привремен заштитен покрив врз градбата. По изведбата на заштитниот покрив, екипите ќе продолжат со истражувачките работи на архитектурата и на покривните елементи, а акцент ќе биде ставен врз утврдувањето на првичните висински коти на овој храм. Со тоа ќе завршат археолошките истражувања и ќе се заокружат истражувачките работи на архитектурата и на покривот.
По заокружувањето на истражувачките работи и изготвувањето на проектната документација, ќе се пристапи кон непосредни конзерваторско-реставраторски работи на фрескоживописот за што ќе бидат применети современи техники и методи. Со претстојните конзерваторско-реставраторски активности, црквата „Св.Ѓорѓија“ во Курбиново ќе биде целосно заштитена и во внатрешниот и во надворешниот дел.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
