Митриќески ќе го снима „Деца на сонцето“ во Преспа

Шода и Митриќески соработуваат уште од студентските денови во Полска, каде што Митриќески има дипломирано на Државната школа за театар, филм и телевизија во Лоѓ, на отсекот за филмска и телевизиска режија во 1987 година.

Јарек Шода беше директор на фотографија и на претходниот игран филм на Митриќески, „Како лош сон“.

– Пресреќен сум што повторно ќе работам со Митриќески. Ние многу лесно наоѓаме заеднички јазик, а понекогаш се разбираме и без зборови. Љубовната приказна на Михиќ буквално ја голтнав од првиот до последниот ред. Деновиве уживав покрај Преспанско Езеро, кое мислам дека е совршена локација да се наслика приказната за филмот“ – изјави Шода.

Планирано е снимањето да трае 36 дена. Речиси сите локации се покрај самото езеро, каде што ќе бидат изградени и адаптирани објекти.

Инаку, ова е трет игран филм на Митриќески, на кој му претходат „Преку езерото“ од 1997 година и „Како лош сон“ од 2003 година. Продуцент на филмот е Дејан Милошевски. Автор на музиката е Влатко Стефановски, кој во филмот ќе глуми и епизодна улога. Главната машка улога му е доделена на младиот македонски актер Кире Ѓоревски.

„Деца на сонцето“ е копродукција меѓу Македонија, Хрватска, Словенија и Србија, а најголемиот дел од средствата ги обезбедува македонскиот Филмски фонд.