Хрватска го поддржува членството на Македонија во НАТО

Претседателот на Владата на Република Македонија, Никола Груевски, денеска оствари средба со министерот за одбрана на Република Хрватска, Анте Котромановиќ.

На средбата беа поздравени одличните односи помеѓу двете земји, кои се развиваат во духот на пријателството, соработката и меѓусебното почитување.

Соговорниците разменија мислења на повеќе теми од различни области кои се од интерес за понатамошно унапредување на односите, акцентирајќи ја соработката на проекти во полето на одбраната.

Премиерот Груевски ги истакна реформите и мерките кои се преземаат за унапредување на стандардите од полето на одбраната.Тој истакна дека членството во НАТО алијансата претставува стратешка определба. Посочи дека Република Македонија зема активно учество во мировните мисии на НАТО и претставува активен партнер во исполнување на функциите и целите на Алијансата.

Министерот за одбрана Котромановиќ истакна дека Република Хрватска активно го поддржува членството на Република Македонија во НАТО, истакнувајќи дека државата ги исполнува стандардите и високите критериуми за целосно членство. Тој посочи дека Република Хрватска дава целосна поддршка на активностите за реализација на проекти кои што ќе придонесат за јакнење на регионалната соработка и напредок на регионот.

Беше разговарано и за подготвеноста и можноста за интензивна соработка во однос на повеќе конкретни проекти како што е соработката во однос на Центарот за обука на пилоти, и за соработката во областа на образованието на кадри од областа на одбраната.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.