ЕК го почитува изборот на грчкиот народ

Европската комисија ќе го почитува суверениот и демократски избор на гркиот народ, изразен на вчерашните предвремени парламентарни избори. Ова, како што јавува дописникот на МИА од Брисел, е официјалниот став на Европската комисија, што попладнево го соопшти портпаролот на Комисијата, Маргаритис Схинас, кој е поранешен европратеник од редовите на партијата Неа демократија, која беше поразена од СИРИЗА и заминува од власта по вчерашните избори.

Додека челникот на Еврогрупата, Жером Дајселблум, за попладнево закажа вонреден состанок со единствена точка на дневен ред состојбата во Грција и решавањето на грчкиот долг, неформалната Влада на Унијата е во шок и го очекува официјалното формирање на новата влада на Грција со Алексис Ципрас како нејзин претседател.

– ЕК целосно го почитува суверениот и демократски избор на грчкиот народ. Подготвени сме да се посветиме со новата влада на Грција откако ќе се формира. Грција направи извонреден прогрес во последните години и подготвени сме да продолжиме да им помогаме во соочувањето со другите реформски предизвици – истакна портпаролот на Еврокомисијата, Схинас.

На прашањето дали претседателот на Комисијата, Жан-Клод Јункер ќе се извини на Ципрас и на новата грчка власт за неговото вмешување во предизборната кампања, кога побара од Грците да гласаат за познати лица, што беше јасна порака да се бојкотира СИРИЗА и, пред сѐ, Ципрас, што не е надлежност на ЕК, гласноговорникот на неформалната влада на ЕУ со одговор:

– Јункер и Ципрас беа главни кандидати за местото претседател на Комисијата на европските избори. Јункер и Ципрас се познаваат од претходно, па барањето да се гласа за познати лица има простор за различна интерпретација – одговори комисискиот гласноговорник, поранешен член на грчката партија Неа демократија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.