ИД го потврди убиството на јапонскиот заложник Харуна Јукава

Џихадистичката група Исламска држава (ИД) потврди дека нејзини припадници го убиле Харуна Јукава, еден од двајцата јапонски заложници.

– ИД ја оствари својата закана. Таа го уби јапонскиот заложник Јукава, откако помина рокот кој го дадовме, соопшти екстремистичката група на радиото Ал-Бајан, кое се слуша на териториите кои се под нејзина контрола во Сирија и Ирак.

– Вториот заложник, Кенџи Гото, бара од своите роднини да извршат притисок врз јапонската Влада за ослободување на нашата сестра Саџида ал-Ришави, која е затворена во Јордан, во замена за своето ослободување, наведува ИД.

Ирачанката Ришави требало да биде еден од бомбашите-самоубијци во тројниот напад врз хотели во јорданскиот главен град Аман на 9 ноември 2005 година, во кои загинаа 60 лица.

Јукава е киднапиран минатото лето, а Гото кон крајот на октомври кога заминал во Сирија со цел да се обиде да го спаси својот пријател Јукава. Џихадистите на 20 јануари објавија снимка од двајцата Јапонци, заканувајќи се дека ќе ги убијат во рок од 72 часа, доколку не им биде исплатен откуп од 200 милиони долари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.