Премиерот Груевски им го честита Божик на православните верници

Претседателот на Владата на Република Македонија Никола Груевски по повод големиот христијански празник Божик упати честитка до поглаварот на Македонската православна црква – Охридска архиепископија, архиепископ Охридски и Македонски г.г. Стефан, членовите на Синодот, на ценетото свештенство и монаштво, и до сите православни верници од Македонија и дијаспората.

– Христовото раѓање и симболиката на Божик е една од најсилните поткрепи на секој верник. Овој ден не потсетува дека Бог во својата намера да го доближи човекот до себе, одлучи и Самиот Тој да постане човек и да ги превземе врз себе сите слабости и гревови на човековата природа. Токму затоа, Божик е најубавиот и најрадосниот христијански празник. Да одбележиме, но и да се потрудиме да вратиме со добри дела, со чиста мисла, со љубов, толеранција и трпение. Да го празнуваме заедништвото со Бога и да се помолиме и во иднина Бог да биде со нас во сите потешкотии за да ги надминеме, во секоја тага за да ја пребродиме и во секоја радост да ја удвоиме, се вели во честитката.

Воедно, се додава, како денес, така и засекогаш, нашите срца и домови нека бидат отворени за нашиот Бог, за сета добрина и милостина, нека од нив блика светлина која ќе ја рашири божикната магија од милосрдие и радости.

– Нашите молитви нека донесат многу здравје, успех и благосостојба на сите верници во Република Македонија и секаде во македонската дијаспора. Нека Бог донесе мир и љубов во сечие срце! Нека неговата мудрост ни донесе благосостојба и многуброен пород! Нека е за многу години големиот христијански празник – Божиќ! Христос се роди!, се вели во честитката од премиерот Груевски.

Тој исто така, упати честитка до претседателот на Евангелско-методистичката црква, Емил Заев и до сите верници на таа црква.

– Вам, како и на сите верници од Евангелско-методистичката Црква во Република Македонија, Ви посакувам добро здравје, среќа и напредок. Бидете благословени и нека Ви е честит големиот христијански празник. Нека ни е за многу години празникот! Христос се роди – Навистина се роди!, стои во честитката на премиерот Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.