Капетанот на фериботот „Норман Атлантик“, што вчера се запали во Јадранско Море, последен го напушти бродот, откако заврши евакуацијата на 478-те патници и членови на екипажот.
Арџилио Џакомаци го напушти бродот во 14:50 по локално време, објави на Твитер италијанската крајбрежна стража. Шеесет и двегодишниот капитен чекал да биде евакуиран и последниот член на екипажот и последниот патник, пред да го напушти оштетениот ферибот.
Во меѓувреме италијанската крајбрежна стража објави дека се откриени уште две тела. Италијанскиот министер за транспорт Маурицио Лупи изјави дека бројот на загинати достигна осум лица, а 427 се спасени, вклучувајќи 56 членови на екипажот.
Грчката крајбрежна стража соопшти дека судбината на 38 лица се уште е непозната. Спасувачи го пребаруваа фериботот, кој беше опфатен од пожар во Јадранското Море. Во оригиналниот список на патници на бродот фигурираат 478 лица, вклучувајќи патници и екипаж.
Лупи изјави дека рано е да се шпекулира дали ќе има се уште исчезнати луѓе, но е можно да има лица, кои резервирале место на фериботот, но не биле на бродот. Властите го споредуваат списокот со имиња на 427 спасени.
Италијанските власти добиле од Грција предлог да бидат испратени службеници на грчката противпожарна служба за помагање на напорите при пребарување на фериботот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
