Кјетил Јансруд двоен победник во Лејк Луис, Никол Хосп неприкисновена во Аспен

Викендов продолжија натпреварите во Светскиот куп во скијање. Мажите имаа двојна програма. По спустот возен во саботата во канадскиот скијачки центар Лејк Луис, вчера се одржа и првата супервелеслаломска трка.

Вистински подвиг направи Норвежанецот Кјетил Јансруд, кој е двоен победник во најбрзите дисциплини.
Тој во саботата на патеката за спуст беше најбрз со време од 1:50.20 минути и за само 14 стотинки беше побрз од домашниот натпреварувач Доминик Озборн-Паради и од Французинот Гилјермо Фаед, кои постигнаа исто време и го поделија второто место.
Вчера на програмата беше втората брзинска дисциплина, супервелеслаломот. Повторно победник беше Јансруд, кој направи вистински подвиг. Очигледно, добро подготвениот за оваа сезона Јансруд, овој пат со поголема разлика пред конкурентите за 29 стотинки, со време од 1:32.02 минути ја извози оваа трка.
На второто место се пласираше Австриецот Матијас Маер, а на третото место со само две стотинки заостанување зад второпласираниот доскија Италијанецот Доминик Парис. Вториот Австриец, Отмар Штридингер, за една стотинка го испушти подиумот и се пласираше на четвртото место.

Во женската конкуренција во американскиот скијачки центар Аспен вчера беше возена втората трка во овогодишниот шампионат во слалом.

По две извозени трки на кои се сумираат времињата, најдобар резултат оствари Австријката Никол Хосп, која оствари вкупно време од 1:44.90 минути и за 19 стотинки беше подобра од Швеѓанката Фрида Хансдотер. На третото место се пласираше Катрин Цетел, која заостана речиси цела секунда – 1:45.85 минути.

Во генералниот пласман во слалом по две извозени трки води Фрида Хансдотер со 160 бода пред Тина Мазе и Никол Хосп кои имаат освоено 129 бода.
Во вкупен пласман за Светскиот куп во женска конкуренција води Цетел со 250 бода, пред Шифрин со 209 и Мазе со 188 бода.

Во вторник се вози спуст во двете конкуренции – мажите ќе настапат во Бивер Крик, САД, а жените во Лејк Луис, Канада.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.