Десет пациенти сѐ уште се лекуваат на Инфективното одделение во Клиничка болница-Штип откако се затруле од бактеријата салмонела.
Пет пациенти се пуштени на домашно лекување, а за тројца се чекаат резултати, информира денеска началникот на Инфективното одделение во Клиничка болница-Штип, Глорија Караѓозова. Таа додава дека состојбата на хоспитализираните пациенти е стабилна.
– Во однос на клиничката состојба тројца пациенти беа со потешка клиничка слика, останатите беа со една лесна клиничка слика. Пациентите ќе бидат хоспитализирани додека клиничката состојба не се среди, односно нормализира , за тоа време ќе ги добиеме и резултатите од микробилошките анализи, вели Караѓозова.
Според првичните информации причината за пациентите заболени со салмонела се еклери. Санитарниот инспекторат зел мостри и брисеви од работните маси на една штипска слаткарница и на еден супермаркет. Вработените од слаткарницата се испратени на вонредни хигиенско –санитарни прегледи. Резултатите од мострите и брисевите за изворот на салмонелата се очекуваат во петок.вдј/цр/15:44
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
