Студентите на УКИМ не пријавуваат корупција, бидејќи не веруваат дека ќе сменат нешто

Најголем дел од студентите на УКИМ не пријавуваат корупција бидејќи сметаат дека со тоа нема да променат ништо, покажале резултатите од Регионалното истражување на темата: перцепција за корупција во Високото образование кое беше спроведено од страна на Младински образовен форум во Македонија.

Ова истражување е спроведено во рамките на Анти корупциската студентска мрежа во Југоисточна Европа (АЦСН – СЕЕ) и ги истражува перцепциите за корупција во најголемите високообразовни установи во Македонија, Србија, Хрватска, Молдавија и Бугарија. Најголемиот број испитани студенти од УКИМ (19% од испитаниците) одговориле дека: најголем проблем на нивниот универзитет е недоволната инволвираност на студентите во процесот на носење одлуки”, велат во МОФ.

На прашања во врска со непотизам студентите одговориле дека најмалку 22% од нив биле директно изложени на 4 форми на непотизам, додека изложеноста на поединечните форми на непотизам е поголема и достигнува 30%. Речиси 70% од анкетираните одговориле дека не би пријавиле ако знаат дека некој од колегите бил примен на факултет со познанства. Околу 25 отсто одговориле дека би пријавиле, но само доколку е анонимно, а само 4 отсто би пријавиле доколку се бара да се открие и нивниот идентитет.На прашање колку од студентите имаат директно искуство со поткуп 39% изјавиле дека имале директно искуство кога студентот купува книга од професорот со цел да добие поголема оценка. За компарација од испитаните студенти во Загреб само 9.9% имале вакво искуство. Потоа, студентите одговарале и на прашања за нивната подготвеност да пријават професор што примил поткуп. Вкупно 66% одговориле дека би пријавиле, но само под услов пријавувањето да е анонимно, 26.8% би пријавиле доколку се бара откривање на нивниот идентитет.

Ситуацијата во сите држави што се дел од ова истражување е слична, со над 60% од испитаниците што би го пријавиле професорот само под услов пријавувањето да е анонимно.

Зошто студентите не пријавуваат корупција?

Најчест одговор кај студентите е дека не веруваат дека би промениле нешто со 28% од вкупните испитаници, додека 21% се плашат од одмазда.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.