Амерканските разузнавачки служби ја потценија моќта на исламските бунтовници во Сирија, призна претседателот на САД, Барак Обама, во интервју за „Си-Би-Ес“. Според него, американската војска, во соработка со сунитските племиња, ја совладала Ал Каеда во Ирак, но таа терористичка организација го искористила хаосот во соседната Сирија и таму „воскреснала“ под ново име, Исламска држава.
Обама ја опишал Сирија како „нулта точка“ за милитантите.
– За време на хаосот во Сирија, додека во голем дел од земјата владее безвластие, терористите успеале да се реорганизираат, да ја искористат ситуацијата и да привлечат странски борци кои веруваат во нивните исламистички бесмислици – рекол тој.
Претседателот додал дека милитантите го асимилирале остатокот од војската на Садам Хусен и така добиле воена моќ. На прашањето дали САД ја прецениле способноста на регуларната ирачка војска за борба против милитантите, Обама одговорил: „Тоа е вистина. Апсолутно вистина“.
Обама смета дека решението за кризата лежи во политички договор меѓу шиитите и сунитите. Според последните информации од теренот, муџахедините на ИСИЛ се наоѓаат на само десет километри западно од Багдад. Исто така, силите на ИСИЛ сѐ уште силно го напаѓаат градот Кобан, кој го бранат локални курдски сили.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
