Во тек се подготовките за јубилејното, десеттото издание на Моден викенд Скопје кое ќе се одржи од 23 до 27 октомври и ќе биде во знакот на сензуална геометрија, чисти форми и неонски бои.
Фотосесијата за новиот имиџ означи старт на подготовките за претстојната сезона есен/зима ‘14/’15 чие заштитно лице е моделот Моника Алексовска, која беше прогласена за најдобра манекенка на годинешното априлско издание на Модниот викенд.
Во центарот на вниманието на октомриската модна недела ќе биде заводливата мода од 60-тите години на минатиот век. Графичкиот минимализам и сензуалноста претставени преку дигитални цветови кои беа застапенин минатата сезона овој пат се преточени во поедноставен облик.
– Оваа есен/зима ќе ја одбележи безвременскиот, класичен изглед со нагласени очи, црн туш , истакнати трепки и сензуални усни. Вистински редизајниран твиги-стил – вели Зоран Шурбевски, кој се погрижи за шминката во соработка со „Авон“, кој е и официјален партнер за шминка на десеттото издание на Моден викенд.
За трендовите во однос на фризурата , познатиот стилист Бубе од фризерското студио „Бубе студио ин“ вели дека строгите линии ќе доминираат оваа есен.
– Строгите линии кои ќе бидат апсолутен тренд следната сезона на изгледот му даваат моќност и безвремнска женственост – вели Бубе.
Креацијата во која е облечена Алексовска е на Виктор Цветановски, кој се претстави со капсулна колекција на априлското издание на Моден викенд Скопје.
фото: Ани и Дими
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
