Коцкарски долгови причина за двојното убиство во Вевчани?

полиција

Владо Попески, сопственик на кафеаната „Пјаца“ и Матеј Ѓурчески се убиените вевчанци во синоќешниот тежок инцидент во Вевчани. Ранети се и Илија Пржитоски и Горан Коруноски. Осомничен за убиството е поранешниот вевчански поштар Здравко Србакоски. Сите петмина се од Вевчани, пишува МКД.

Според сè уште непотврдени информации, како што пишува МКД, причина за убиството била расчистување на некои долгови и нерасчистени сметки меѓу Србакоски и Попески.

Осомничениот за двојното убиство, поранешниот вевчански поштар, веќе 20 години не се појавувал во селото и бил во бегство поради големи коцкарски долгови. Тој, пред неколку дена се вратил во Вевчани и имал расправија со Попески и пак заминал. Синоќа Србакоски се вратил во Вевчани, влегол во кафеаната „Пјаца“, побарал пари од Попески, по што настанала вербална расправија и во еден момент поранешниот вевчански поштар го извадил пиштолот. Тој истрелал цел шаржер куршуми. Еден од убиените починал во кафеаната, а вториот на пат за болница. Двајцата тешко ранети се хопитализирани во струшката болница и во охридската болница „Свети Еразмо“.

Убиецот избегал кон планината, но полицијата го пронашла и го притворила.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.