Пет кластерски здруженија денеска добија решенија за финансиска поддршка од вкупно 1,6 милион денари за реализација на нивните проекти.
Решенијата се дел од владината Програма за конкурентно, иновации и претприемништво за 2014 година, а ги врачи министерот за економија Беким Незири.
– Суштината на постоењето на кластерите, посебно атрактивни за малите и средните претпријатија, е иницирање заеднички активности и проекти за развој на секторот, регионот, иновациите и извозот преку зголемување на соработката меѓу фирмите, науката и други развојни фактори. Успешното поврзување во кластер резултира со мрежа од заемно корисни врски за размена на информации, идеи, нови технологии, истражувања, здобивање способности, пазари, нови деловни модели – истакна Незири пред доделувањето на решенијата.
Според него, резултатот од функционирањето на кластерските здруженија во Македонија е евидентен и веќе има ефект врз стимулирањето на економијата.
– Целта не е само размена на искуства и знаења, туку и градење стратегии за развој, како и извозна промоција – нагласи министерот.
Државата ги поддржува активностите на кластерските здруженија преку програми од 2009 година. За 2014 година до Министерството за економија пристигнале 14 проекти од кои се избрани најдобрите, креирање национална асоцијација на кластери и развивање курикулми за тренинг центар – 400.000 денари, конфекциско инжинерство – 393.400 денари, активности за зголемување на конкурентноста, подобар квалитет на производите преку едукација и показно демонстративни платформи за сушење печурки – 380.000 денари, изработка на промотивен извозен каталог – 295.500 денари и поврзување со универзитетите – 131.100 денари.
Во петте кластерски здруженија што ја добија финансиската поддршка членуваат 120 компании со околу 20.000 вработени.
Одговарајќи на новинарско прашање, министерот Незири потсети дека од пред еден месец во Македонија постои фонд за иновации. Тенденцијата е да се обезбедат што повеќе средства за поддршка на ваквите проекти, но и интензивно едуцирање особено на локалните здруженија од оваа сфера – како да аплицираат и кои услови да ги исполнат за искористување што повеќе пари.
– Владата сака да иницира различни проекти. Подготвени сме да ги поддржуваме и финансираме, но паралелно подготвуваме и програми за едукација. Обезбедените средства засега не се на потребното ниво. Ќе настојуваме до година да ги зголемиме, како и да се интензивира реализирањето на веќе проектираните – посочи министерот за економија Незири.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
