Македонската владина делегација во посета на Кина

Владината делегација предводена од премиерот Никола Груевски по посетата на Јапонија и Република Кореја, од денеска ќе престојува во посета на Специјалниот административен регион Хонгконг, кој е дел од Народна Република Кина.

Премиерот Груевски ќе оствари средба со претседателот на Извршниот совет на Хонгконг, Ленг Чун Јинг, а ќе ја посети и хонгконгшката болницата „Квин Мери“ (Queen Mary), каде ќе разговара за соработка во областа на здравството, а ќе се обрати и на деловен форум организиран од „Фајненшл тајмс“.

Во Народна Република Кина македонската делегација треба да го посети и градот Гуангжу, кој претставува седиште на мултинационалната компанија „Веибо“, која веќе има донесено одлука за инвестирање во Македонија и за отворање фабрика во североисточниот реон со која ќе се отворат околу 5.000 работни места. Планирани се средби и со политичките претставници на регионот Гуангдонг.

Со ова владината делегација ќе ја заокружи посетата на државите од азискиот континент.

За време на посетата на Република Кореја македонската делегација пред бизнисмените од оваа азиска држава ги презентира поволните услови за инвестирање во Македонија на бизнис форум, што се одржа во Сеул, а беше организиран во соработка со „Фајненшл тајмс“.

Пред Кореја, македонската делегација беше во посета на Јапонија каде што премиерот Груевски оствари средби со принцот Нарухито и со премиерот Шинзо Абе. На деловниот форум беа промовирани поволностите за инвестирање, а во функција на овозможување на услови за соработка во областа на здравството, беше реализирана и средба со менаџерскиот тим на болницата „Токио џенерал хоспитал“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.