По 35 години, Македонија ќе добие најсовремени патнички возови

– Педесет милиони евра македонската влада издвои за Проектот за обнова на возниот парк на „МЖ Транспорт“ АД-Скопје. Од нив 25 милиони за набавка на патнички вагони, 15 милиони за товарни и 10 милиони за рехабилитација на старите гарнитури на возови – истакна денеска вицепремиерот Зоран Ставрески при потпишувањето на договорот за набавка на најсовремени гарнитури за патнички возови со кинеската корпорација „ЦСР“.

Вицепремиерот истакна дека овој договор за набавка на четири дизел-моторни гарнитури и две електро-моторни гарнитури во рамки на Проектот за обнова на возниот парк на „МЖ Транспорт“ АД-Скопје претставува само 10 отсто од она што се предвидува да се вложи во наредниот период.

– Железницата, иако е најевтин начин на траспорт, досега не беше целосно искористена, а причините за тоа беа недостатокот на инвсетиции во инфраструктура, вагони и локомотиви. Стратегијата на Владата за модернизација на македонските железници е јасна, прво ивестиции во инфраструктурата и инвестиции во нови вагони – истакна Ставрески.

Ставрески посочи дека како партнер во реализацијата на овој проект е кинеската Корпорацијата „ ЦСР“, една од  најголемите компании во светот за производство на вагони и локомотиви и според  договорот првите гарнитури ќе бидат испорачани за 12 месеци.

Новите патнички гарнитури ќе имаат капацитет од околу 1200 патници, целосно ќе бидат климатизирани, опремени со вакуум тоалети, енергетски ефикасни и ќе ги задоволуваат сите безбедносни стандарди,  како и стандардите на превоз на лица со ограничена  мобилност.

– Денес почнуваме со една нова поинаква слика за железницата, за железничкиот транспорт во нашата земја. Со тоа продолжуваме со модернизација на состојбите во железничкиот сектор и негово максимално насочување кон задоволување на потребите на граѓаните со квалитетен ефикасен и ефективен патнички превоз со модерни возови какви што заслужуваат македонските граѓани – истакна министерот за транспорт и врски, Миле Јанакиески.

Директорот на „МЖ Транспорт“ АД-Скопје, Оливер Деркоски, истакна дека со овој договор се свртува нова страница во железничкиот сообраќај.

– По 35 години апстиненција од набавки на нови гарнитури на возови за превоз на патници конечно во Република Македонија стартуваме со обнова на возниот парк – потенцираше Деркоски.