Груевски: Отписот на долгот ќе им помогне на социјално најранливите

Има работи кои можат веднаш да се направат и за нив се пристапува за брзо завршување. Пред изборите ветуваме, а граѓаните ни даваат доверба за тоа. Фер е да се исполни ветеното најбрзо што е можно. Затоа завчера беше изгласано еднократното отпишување на долговите на граѓаните од социјално ранливите категории. Со овој проект се опфатени примателите на социјална и постојана парична помош, невработените кои активно бараат работа 12 месеци и оние кои во несреќни околности го изгубиле својот брачен другар и способноста за плаќање на сметките, истакна премиерот Груевски при гостувањето во Дневник 2 на МРТ1.

Утврдени се условите во законот, ќе бидат вклучени ЕВН, Топлификација, односно новата компанија која доаѓа на нејзиното место, извршителите, нотарите, баните, кредитите под Г и Д категоризација, радиодифузна такса.

Премиерот потенцираше дека Министерството за финансии силно работело за овој закон да биде прецизен и додаде дека ова било првата точка која се разгледувала во Собранието.

– По носењето на законот во Парламентот и неговото стапување во сила граѓаните ќе имаат 30 дена да се пријават, а потоа ќе бидат детално информирани за целосната потребна документација. Потоа соодветните институции ќе си ја завршат својата обврска – додаде Груевски.

Премиерот исто така истакна дека интересот за соработка на компаниите за овој проект е добар и смета дека не би требало ни во иднина да има непредвидени проблеми.

Тој рече дека со овој проект ќе им се помогне на оние кои се во најтешка состојба и додаде дека тие треба да добијат дополнителна помош.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.