„Арго“ и „Линколн“ со најмногу шанси за Оскар

Судејќи според наградите освоени во сезоната, филмот на Бен Афлек „Арго“ има најголеми шанси да освои „Оскар“ за најдобар филм, додека Дениел Деј Луис, кој го глуми Абрахам Линколн во истоимениот филм е најсериозен кандидат за освојување на „Оскар“ во категоријата најдобар актер.

Филмот на Бен Афлек во кој се говори за спасувањето на американските заложници во Иран во 1979 година освои „Златен глобус“ за најдобар филм, а во истата категорија победи и на доделувањето на наградите на Британската академија за филмска и телевизиска уметност (БАФТА). „Арго“ е номиниран и за машка споредна улога, адаптирано сценарио, монтажа, оригинална музија, звук и монтажа на звукот. Освен „Арго“ за оскарот во категоријата најдобар филм се борат уште и „Линколн“, „Животот на Пи“, „Клетници“, „Секое зло за добро“, „Џанго Разузданиот“, „Тајна операција“ и независниот филм „Ѕверови на јужните дивини“.

Ако Дениел Деј Луис утре во Лос Анџелес освои „Оскар“ за најдобра машка улога, тоа ќе му биде трета статуетка во неговата кариера. Досега ја освои оваа награда за филмовите „Моето лево стопало“ во 1989 година и „Ќе има крв“ во 2007. Деј Луис сезонава веќе го освои „Златниот глобус“ и наградата БАФТА.

Буиграфскиот филмот за 19. претседател на САД во режија на Стивен Спилберг има најмногу номинации за „Оскар“. Освен за најдобар актер и најдобар филм, тој е номиниран и за споредна машка и женска улога, режија, адаптирано сценарио, фотографија, монтажа, сценографија, костимографија, оригинална музика и звук.

Според бројот на номинации не заостануваат и „Животот на Пи“ кој има 11, потоа „Секое зло за добро“ со осум, „Арго“ со седум и „Љубов“ и „Тајна операција“ со по пет.

Освен Деј Луис за главна машка улога номинирани се и Бредли Купер, Хју Џекамн, Јоакин Феникс и Дензел Вашингтон.
Осумдесет и шест годишната Емануел Рива, која ја толкува главната женска улога во „Љубов“ веќе ја освои наградата „БАФТА“, а филмот за „Оскар“ е номиниран и во категоријата а најдобар филм, режија, најдобар филм од неанглиско говорно подрачје и за оригинално сценарио. Освен Рива за „Оскар“ за најдобра женска улога ќе се борат Џесика Честејн, Џенифер Лоренс, Наоми Вотс и Кинвенсан Волис.

За најдобри споредни актери се номинирани Ален Аркин, Роберт де Ниро, Сејмор Хофман, Томи Ли Џонс и Кристеофер Волц, а кај актерките Еми Адамс, Сали Филд, Ен Хетавеј, Хелен Хант и Џеки Вивер.

За најдобар режисер, освен Спилеберг уште се номинирани и Бен Зејтлин, Анг Ли и Дејвид О. Расел.

Освен францускиот „Љубов“ во категоријата најдобар филм од неанглиско говорно подрачје се номинирани норвешкиот „Кон-тики“, чилеанскиот „Но“, данскиот „ “Кралска афера” и канадскиот “Војна вештерка”.

„Оскарите“ оваа година ќе ги води Сет Мекфлејн, а меѓу презентарите ќе бидат и Хали Бери, Никол Кидман, Сандра Булок, Роберт Дауни Џуниор и други.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.