Франгов ќе ја сведе невработеноста во Гевгелија на минимум

Франгов на почетокот истакна дека од предложените проекти во изборната програма, над 80% се остварени или се при крај, а уште триесетина проекти кои не беа запишани во програмата, станаа стварност, и поради тоа ја прифатил кандидатурата за градоначалник на општината со најмала невработеност.

Тој пред граѓаните на Гевгелија ја претстави својата обемна програма.

-Има уште многу значајни проекти кои во иднина треба да се реализираат со цел да се подобрат условите за живеење. Дел од проектите се веќе започнати и треба да се довршат. Во тек е изградбата на Технолошко развојната индустриска зона кај Прдејци, започнавме со изградбата на нов Градски пазар и нова Автобуска станица, дел од спортско-рекреативниот центар кај Касарната веќе е уреден, обезбедени се средства и комплетна документација за нова канализација во Прдејци и Мрзенци, од ИПА-Програмата за прекугранична соработка одобрени се средства за изградба на одводен канал во Негорци, претстои распишување на тендер за доградба на 14 училници во Средноучилишниот центар „Јосиф Јосифовски“, изработен е идеен проект за нов градски плоштад, а веќе е иновиран  проектот за Конска брана, потенцираше Грангов.

Дел од приоритетните проекти на Франгов се развој и промоцијата на индустриската зона Билото, како и довршување на проектот Градски пазар, со поддршка на Владата на Република Македонија се планира и изградба на нов објект за Факултет за бизнис, логистика и туризам.

Тој напомена дека и во идниот период приритет ќе биде преку обезбедувањето на нови инвестиции во Технолошко индустриската развојна (ТИРЗ) зона во локалитетот Прдејци и преку поддршката на формирање на нови мали и средни претпријатија да се задржи и да се намали ставката на невработеност од 19 проценти.

Изградба и реконструкција на училишни објекти, спортски сали, обезбедување финансиска помош за младите таленти преку стипендии и награди, отворање бесплатни интернет-клубови во населените места и организирање на курсеви за информатика и изучување странски јазици, потоа изградба на прочистителчна станица, подобрување на водоснабдувањето, се само дел од богатата програма на кандидатот за градоначалник Иван Франгов.

-Со одобрените 430.000 евра од ИПА-Програмата за прекугранична соработка со Република Грција, наскоро претстои реновирање и опремување на Општа болница во Гевгелија, како и реконструкција на Здравствен дом во Гевгелија, истакна Франгов.

На промоцијата присуствуваше и премиерот Никола Груевски кој нагласи дека е тука да му даде поддршка на кандидатот за градоначалник Франгов, дека секогаш имало одлична соработка меѓу нив, и се што било ветено во најголем дел било исполнето.

-Со понудените нови конкретни  проекти и рокови за нивно реализирање, сплотени под слоганот НОВИ ДЕЛА ЗА НОВ НАПРЕДОК, НОВИ ДЕЛА ЗА ПОДОБРА ГЕВГЕЛИЈА, во наредните четири години, од Гевгелија ќе  направиме не само порта, туку и  вистински дел од Европа, додаде за крај кандидатот за градоначалник Иван Франгов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.