Истрагата треба да ги утврди причините зошто двајцата работници на „Македонска железница“ паднаа во реката Вардар од железничкиот мост во село Долно Лисиче.
– Истрагата треба да утврди како двајцата работници паднале од мостот и дали биле испочитувани сите безбедносни стандарди – велат од МВР.
Скопјаните Трајан Божиновски и Драган Стефановски, двајцата вработени во „Македонски железници- Инфраструктура“ и двајцата пред пензија, загинаа завчера претпладнето додека работеле пред специјалниот багер, кој пренесувал трупци за шините.
Според неофицијалните информации, едниот бил надзорник на реконструкцијата на железничкиот мост, а другиот работник.
Не е познато како се случила несреќата, бидејќи Божиновски и Стефановски биле одвоени од другите работници, кои биле на другиот крај од мостот, а не се слушнало ништо, бидејќи стоеле пред багерот, кој бучел.
Се претпоставува дека едниот од нив се лизнал, а другиот се обидел да го задржи по што двајцата паднале во реката.
Припадниците на единицата за специјални задачи на МВР „тигар“ пристигнале на местото и со чамци ја пребарувале реката. По неколкучасовната потрага специјалците ги пронашле и ги извлекле безживотните тела на двајцата работници.
Надлежните од „Македонска железница“ велат дека и двајцата носеле заштитни шлемови.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
