Анкета на „Павел Шатев“: ВМРО-ДПМНЕ, Груевски и Иванов уживаат голема доверба, 55 проценти сметаат дека ги исполнуваат ветувањата

ВМРО-ДПМНЕ, Груевски и Иванов имаат огромна предност пред опозициската СДСМ, покажуваат резултатите од последната анкета на Институтот „Павел Шатев“ спроведена во периодот меѓу 2 и 5 април на барање на порталот „Курир“.

Според телефонската анкета спроведена на 1.430 испитаници, во сите шест изборни единици, ВМРО-ДПМНЕ има поддршка од 27,4 проценти од граѓаните, додека опозициската СДСМ од 15,2 проценти.

Премиерот Никола Груевски, пак, со рејтинг од 27,8 проценти ужива речиси четири пати поголема доверба од лидерот на СДСМ, Зоран Заев, за кого се изјасниле 7,1 проценти од анкетираните.

Многу поголема е разликата меѓу граѓаните кои веруваат во победа на ВМРО ДПМНЕ. Дури 34,9 проценти се изјасниле дека веруваат во победа на владејачката партија, а 14,1 проценти сметаат дека победа ќе извојува СДСМ.

Повеќе од двојно испитаници би го избрале Груевски доколку треба да се одлучат меѓу премиерот и Зоран Заев.

Огромна е разликата и во мислењето која политичка партија има подобра економска програма на претстојните предвремени парламентарни избори. Дека ВМРО-ДПМНЕ има подобра економска понуда се изјасниле 40,4 проценти, а за СДСМ 17,1 проценти.

Дури 55 проценти од граѓаните имаат доверба во  ВМРО-ДПМНЕ и сметаат дека ги исполнува дадените ветувања, а дури 61,5 процент веруваат дека СДСМ нема да ги исполни изборните ветувања.

Огромна предност во однос на противкандидатите има и претседателот Ѓорге Иванов. Зад актуелниот шеф на државата застанале 29,8 проценти од испитаниците, а зад кандидатот на СДСМ, Стево Пендаровски, 16,2 проценти. Зоран Поповски од ГРОМ има поддршка од 2,1 проценти, а Илијаз Халими од ДПА 6,9 проценти.

Во истражувањето кое беше спроведено на ниво на Република Македонија, беа опфатени сите шест изборни единици, како и повеќе демографски карактеристики на населението вклучително пол, етничка припадност и возраст, но беше направена поделба и според руралните и урбани места на живеење, при што Скопје е земено како посебна целина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.