– Во втората половина од годинава се очекува да почнат градежни активности за обнова на железничката пруга Битола-Кременица, со изградба на крак до индустриската зона Жабени – најави денеска министерот за транспорт и врски, Миле Јанакиески.

Проценетата вредност на инвестицијата, посочи Јанакиески, е 20 милиони евра, а финалната ќе зависи од понудите на компаниите.

Постапката за надзор е објавена, а заинтересираните компании треба да достават понуди до почетокот на април. Тендерска документација за градежните работи веќе е одобрена од делегацијата на Европската унија.

– Во текот на оваа година ќе започнат градежните работи. Постапката за надзор е објавена, целокупната тендерска документација за градежни работи е одобрена од страна на Европската делегација, очекуваме во текот на април да биде објавена. Периодот за пријавување на компаниите е 90 дена. Оваа година ќе случиме договори и ќе започнеме со градежните работи – изјави Јанакиески.

Јанакиески оцени дека изградбата на пругата е значајна за развој на регионот и за железничкото поврзување со Грција, како и за индустриската зона Жабени.

– Ова значи развој за овој регион бидејќи ќе имаме ново поврзување помеѓу Македонија и Грција, но иста така е важно што ќе имаме крак до индустриската зона Жабени што ќе ја направи уште поатрактивна како за домашните, така и за странските инвеститори – наведе Јанакиески.

Предвидените градежни активности опфаќаат обнова на 17 километри пруга од крајот на станицата во Битола до границата со Грција, реконструкција на повеќе премини, поврзување со новата индустриска зона во Жабени и изградба на нова железничка станица за прекуграничен сообраќај (патен и товарен) со сите придружни објекти и нова сигнализација и телекомуникациски инсталации.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.