Претседателот на Украина Виктор Јанукович предупреди денеска дека може да употреби сила за да го спречи обидот на своите противници за „насилно преземање на власта“.
– Без мандат од народот, илегално и спротивно на украинскиот Устав, тие политичари ако така може да се наречат, презедоа акции на грабежи и убиства во обид да преземат власт – наведува Јанукович во соопштение по протестите во центарот на Киев, во кои во судири меѓу полицијата и демонстрантите загинаа најмалку 25 лица.
Јанукович истакнува дека досега се воздржувал од примена на сила и нудел дијалог за опозициските лидери, како и можност за избори, но советниците сега му препорачуваат да заземе тврд став.
– Уште еднаш ги повикувам лидерите на опозицијата…итно да се дистанцираат од радикалните сили кои предизвикуваат крвопролевање и судири со полицијата. Доколку тоа не го направат ќе мора да признаат дека ги поддржуваат тие радикали. А, тогаш со нив поинаку ќе се разговара – наведува украинскиот претседател.
Во меѓувреме лидерот на опозицијата Виталиј Кличко изјави дека Јанукович побарал уште една средба со опозицијата.
– Претседателот денеска сака уште еден состанок со опозицијата и ние се согласуваме. Нашето барање е јасно – акцијата на полицијата врз демонстрантите мора веднаш да престане – истакна Кличко.
Лидерите на опозицијата Кличко и Арсениј Јаценјук претходно изјавија дека ги прекинале разговорите со Јанукович без постигнување спогодба за ставање крај на насилството.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
