Зимските олимписки игри (ЗОИ) што почнуваат денеска, 7 февруари, повторно ќе ги спојат најдобрите атлети на планетата, а и овој пат треба да покажат дека се посилни од сите светски проблеми.
Игрите во Сочи имаат неочекувана предигра и почнаа со нова и тивка студена војна меѓу големците Русија, која е домаќин, и Соединетите Американски Држави. Потресите пред почетокот на зимскиот спектакл, закажан за периодот од 7 до 23 февруари, ја предизвикаа една од најболните точки во модерната доба – безбедноста.
Русија како домаќин го одбра бисерот на Црно Море – Сочи и успеа да ја добие довербата на Меѓународниот олимписки комитет и шанса да ги организира дваесет и вторите ЗОИ.
Најдолгиот град во Европа, распослан на 145 километри должина, со прекрасни пејзажи, стана уште поубав, а очигледно е дека Русите се погрижиле за сѐ да помине во најдобар ред. Проблеми со безбедноста воопшто ќе нема бидејќи најавија дека ниту мува нема да прелета над Сочи во периодот од 17 дена кога во 98 дисциплини во 15 спорта ќе се кршат копјата за добар пласман, за престиж и за медал.
Армија од 50 илјади луѓе ќе ги обезбедуваат Игрите, а огромниот тим е составен од полицајци и од војници. Тие ќе се грижат за мирот и спокојот на спортистите, посетителите и на симпатизерите на зимските спортови од 7 до 23 февруари.
Дека не е сѐ така розово, иако се вложени многу труд и инвестиции во целиот проект „ЗОИ во Сочи 2014“, потврди вознемирувачката информација за инфилтрирање припаднички на терористички организации во градот непосредно пред почетокот на Игрите. Станува збор за црни вдовици, мошне опасни и организирани жени-самоубијци кои се дел од исламистичка организација.
Се вклучи алармот кај Американците, сепак ќе нема реприза на бојкотот од Москва 1980
Таа информација го вклучи алармот кај Американците, кои се особено осетливи кога станува збор за односите со Русија. Регионот околу Сочи е опасен од безбедносен аспект, а најмногу се стравува од областа Абхазија, која ѝ припаѓа на Грузија. Таму во 1992 година избувна војна, а последиците се чувствуваат и денес.
Американците веднаш реагираа, а најекстремните барања се да не се учествува на дваесет и вторите ЗОИ во Сочи. Можен ли е нов бојкот на една од двете големи сили, кои одиграа нерешено на штета на светскиот спорт во осумдесеттите години на минатиот век. Американците и нивните сојузници одбија да учествуваат на ЛОИ во Москва во 1980 година, а возвратија Русите четири години подоцна со бојкот во Лос Анџелес. Овој пат, како што велат стручњаците, тешко дека ќе се случи нешто такво и толку драстично како бојкотот од пред три децении, но тивка студена војна меѓу двете велесили постои.
– Спортот ќе го згасне пламенот што тлее и сигурно нема да се запали. Ако ме прашувате мене, јас би одел во Сочи, и тоа со моето семејство, но велам дека сите мора да бидат внимателни. Можно е овие Игри да бидат најопасните досега. Ова го велам само за да се внимава повеќе, а не за да ги заплашам луѓето. Тоа е целта на терористичките одреди и групи, да нѐ заплашат, и со тоа да ја остварат целта, да се чувствуваат како победници. Верувам дека нема да го дозволиме тоа – вели поранешниот заменик-директор во ЦИА, Мајкл Морел.
Малку беше чудна иницијативата на раководството на НХЛ да ја преиспита одлуката за настап на најдобрите хокеари на турнирот ако има влошување на состојбата. Сигурно дека при евентуален терористички атак и останатите федерации и земји не би дозволиле учество на нивните спортисти. Русите уверуваат дека нема причини за грижа и дека овие Игри ќе бидат најдоброорганизираните Игри во историјата.
– Наша задача е да обезбедиме сигурен престој и максимална безбедност за сите учесници и посетители во Сочи за да имаме можност да следиме зимски фестивал од спортови и бидете сигурни дека ќе сториме сѐ за Игрите да минат во најдобар ред – изјави рускиот претседател Владимир Путин.
За такво нешто Русите имаат многу аргументи, кои ги приложија и во вид на неверојатно добриот нов изглед на Сочи. Градот изгледа прекрасно, што е и логично ако се знае колку е вложено во изградба на спортски борилишта, зимски патеки, инфраструктура, сместувачки капацитети и слично.
Русија не штедеше пари за ЗОИ, потроши многу, направи уште повеќе
Русија не штедеше пари за да се покаже како добар домаќин на ЗОИ, па севкупно, според најновите податоци, се потрошени околу 3,7 милијарди евра за целиот проект. Во Сочи ќе се ужива во зимските спортови во февруари на Олимписките игри, но и подоцна во возбудувањата од новиот циклус на Формула 1, а планирано е таму да се играат и натпревари од Светското првенство во фудбал, чиј домаќин е Русија во 2018 година.
Грото од натпреварите во алпските и во нордиските дисциплини ќе се одржат во скијачкиот ресортот Роза Хутор на таканаречената Краснаја Полјана.
За спортовите на мраз, меѓу кои е и атрактивниот турнир во хокеј, се подготвени арените „Бољшој“ и „Ајсберг“, а впечатливо име – „Горки“ – има комплексот скокалници каде што ќе се одржат натпреварите во ски-скокови.
На Игрите во Русија ќе учествуваат рекордни 101 земја со повеќе од 2.500 учесници, меѓу кои најмногубројни се Соединетите Американски Држави со 230 спортисти, зад нив е домаќинот Русија со 225 учесници, па следуваат Канада со 222 и гигантите во зимски спортови – Швајцарија со 168 кандидати за медали, Германија со 152 члена и Австрија, чија спортска експедиција брои 130 спортисти.
Најпозната спортистка меѓу отсутните во Сочи, и тоа поради повреда, е американската шампионка во алпски дисциплини Линѕи Вон. Кралицата на зимските патеки, сепак, ќе биде присутна на Игрите, но како коментатор-аналитичар за „Ен-Би-Cи“.
Македонија држи ритам, ќе се претстави на ЗОИ со тројца спортисти
Македонија, иако нема кој знае каква традиција во зимските спортови, ќе има свои претставници на Игрите во Сочи, и тоа тројца. Антонио Ристевски ќе учествува во две алпски дисциплини – во слалом и во велеслалом, а Марија Колароска и Дарко Дамјановски ќе учествуваат во нордиските дисциплини. Марија е пријавена за трката на 10 километри класичен стил, а Дамјановски ќе учествува во истата дисциплина, но на делница од 15 километри и во машки спринт. Знаменосец ќе биде најискусниот, Дамјановски.
Kолароска настапува на 13 февруари, Дамјановски во трката на 15 километри класично, на 14 февруари и на 50 км, на 23 февруари. Ристевски настапува во велеслалом на 19-ти и во слаломот на 22 февруари.
Во македонската експедиција се и тренерите Иван Лесевски (алпско скијање) и Ѓоко Динески (нордиско), како и потпретседателот на Скијачката федерација на Македонија Владо Пановски, генералниот секретар на МОК Сашо Поповски, лекарот на тимот д-р Зоран Ханџиски. Од МОK ќе присуствуваат и директорот Владимир Богоевски и претседателот Васил Тупурковски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
