Повеќе бебиња повеќе пари за исплата на породилно. Според податоците на zdravstvo24, за минатата година Фондот за здравствено осигурување одвоил една милијарда 533 милиони денари за исплата на породилни боледувања, што е најголема сума досега. Парите биле распределени на 8.200 осигуренички. Во споредба со 2012 и 2011 година, евидентно е зголемувањето како на бројот на родилки така и на сумата пари што ја одвојува ФЗОМ. Во 2012 година имало 7600 случаи за кои биле издвоени 1.375.225.433 денари, додека, пак, во 2011 година имало 7460 родилки, а Фондот исплатил 1.433.382.640 денари.
За надлежните во оваа институција овој тренд на пораст на породилните боледувања е со позитивен ефект бидејќи покажува дека расте наталитетот во земјата. Преку владините мерки од 2013 година за исплата на породилно не се потребни 2 туку 4 просечни плати што им одговора на тие жени. Во минатото биле дискриминирани бидејќи исплатата беше само на две просечни плати. Друга предност за породилните боледувања е што нема доцнење во нивната исплата од страна на ФЗОМ. На крајот на месецот е исплатата за претходниот месец. Пред само неколку години жените мораше да чекаат и по 6 месеци за да ја добијат првата исплата. Според податоците од Фондот, од 2007 до 2010 година вкупно исплатените средства за породилно се зголемени за 111 отсто.
Дека овој тренд е во позитвна насока на зголемување на наталитетот покажуваат и податоците од Државниот завод за статистика според кој во 2012 година имало 23.752 новороденчиња што во споредба со 2011 е за 798 повеќе или раст од 3,5%. Трендот го следи и Клиниката за гинекологија и акушерство, која 2013 година ја заврши со 6000 новороденчиња.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
