Кавадарчанецот осомничен за убиство на сограѓанин во 30 дневен притвор

По наредба на истражен судија доцна попладнево  на 31-годишниот М.Ј. од Кавадарци одредена му е мерка притвор во траење од 30 дена. По одредувањето на мерката М.Ј. ќе биде спроведен во Истражниот затвор во Скопје, информира Анита Стојковска, портпарол на СВР Велес, пренесува МИА.

М.Ј. е осомничен дека до смрт го претепал својот сограѓанин Дејан Д. на 30 декември минатата година. Тој беше приведен синоќа, а во текот на денешниот ден беше на распит во полициската станица Кавадарци. По поднесената кривична пријава беше изведен и пред јавен обвинител.

– По преземени оперативно тактички мерки во соработка со Основното јавно обвинителство Велес,  синоќа  во 18:50 часот од слобода е лишено лице за кое постојат основи за сомнение дека сторило кривично дело убиство, рече Стојковска.

Таа нагласи дека  според сознанијата и документираниот материјал „постојат основи за сомневање дека осомничениот на 30 декември лани  во времето од 8:15 до 8:30 часот го пресретнал сега починатиот пред зграда на улица „Ваташа“, физички го нападнал, удирајќи го со раце и со нозе во пределот на главата и телото по што се оддалечил во непознат правец“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.