Перо Антиќ се уште нема настап за Атланта хоукс месецов, а неговиот тим ноќеска загуби од Оклахома тандерс со 92-101. Македонскиот репрезентативец не доби шанса да игра против Кевин Дурент, Расел Вестбрук, Серж Ибака…. Доминираше Дурент со одличен дабл-дабл од 30 поени и 10 скока. Популарниот Дурантула забележа и 5 асистенции за 37 минути игра. Кај Атланта Пол Милсап беше најефикасен со 23 поени.
Пораз во дербито забележа шампионот Мајами хит, од моментно најдобриот тим во НБА, Индијана. Пејсерс славеа со 90-84 и останаа на врвот со биланс од 19-3. Центарот Рој Хиберт умешно си ја искористи предноста под обрачите и со 24 поени беше прв стрелец на мечот. Мајами нема квалитетен центар, Крис Бош кој е крило мора да покрива на таа позиција, па тука Индијана ја направи клучната разлика. Тие имаа 10 скока повеќе од кошаркарите на Мајами, што ги предводеше Леброн Џејмс со 17 поени, 14 скока и 6 асистенции.
Поразени се и Коби Брајант и соиграчите од Лос Анџелес лејкерс во дуелот со Феникс. Коби Брајант постигна 20 поени, но „езерџиите“ го загубија и вториот меч, откако тој се врати по повредата. Горан Драгиќ кај победничкиот тим беше несопирлив и прокнижи 31 поен за победа на Феникс од 114-108.
Останати резултати: Кливленд – Њујорк 109-94, Торонто – Сан Антонио 103-116, Бруклин – Бостон 104-96, Детроит – Минесота 94-121, Чикаго – Милвоки 74-78.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
