Карл Билт: Грција нема намера да попушти

Грција, според процените на шведскиот министер за надворешни работи, Карл Билт, не покажува дека планира да направи чекор напред во спорот со Македонија за време на нејзиното претседавање со Европската унија.

– Не гледам ништо што укажува во таа насока – одговори Билт на прашањето дали е можно Грција да направи гест во однос на Македонија, за време на нејзиното претседавање со Европската унија во првата половина на 2014 година и да дозволи почнување на преговорите за членство.

Шведскиот министер за надворешни работи и поранешен европски пратеник на Балканот рече дека регионот во целина напредува, но бавно.

– Можеме да се фокусираме и на фактот дека Балканот оди напред. Речиси сите земји од Балканот се во процес на преговори. Само Босна е исклучок. И Македонија е исклучок, но од други причини. Не би бил премногу песимист кон Балканот, можеби се движи побавно отколку што јас би сакал, но се движи – изјави Билт во Вашингтон, каде што е поради планирани дискусии за самитот на источното партнерство.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.