Мис кавга – срамота за државата

Мис на Македонија

Ленти за убавиците кои наликуваат на црните траки што се ставаат на цвеќиња за погреб, само во бела боја, испишани со флуоросцентен маркер, лоша организација, многу грешки – вака изгледаше овогодинешниот избор на Мис на Македонија на кој се бираше девојката која ќе не претставува на Мис на свет. За вкусови не се разговара. Некому победничката му се допаѓа некому не, некој смета дека е преслаба, друг дека е дебела за мис, трет дека е прекрасна, четрт дека личи на Адријана Лима… Но, сепак се работи за вкус, не може секому да му се допаѓа. Но никој не може да остане имун на бедните бели ленти испишани со маркер, на лоѓа организација, понижување на достоинството на девојките… Се бира девојка која ќе не претставува на изборот на Мис на светот во септември. Зарем таа девојка не заслужува малку поинаков третман и поинаков избор. Реагираат оние кои биле присутни на изборот, реагираат читателите кои ги гледаат фотографиите од изборот, реагираат конкурентите. Мики Црнокрак од модното студио Црнокрак, кој ја има лиценцата за Мис глоуб смета дека ова е срам за Македонија.

-Бев сведок на изборот за Мис на Македонија 2013 за Мис на светот. Па ова веќе подолу не може. Како да сме најзаостаната држава на светот, како Бурунди, Зимбабве… Срамота за Македонија, гревота за толку убави девојки и момци на кои нема да им падне на памет да се пријават на каков било избор кога ќе видат вакво нешто. Само едно излегување, без да се видат кандидатките во костими за капење, па како да ги оценат членовите на жири-комисијата? Како да е изборот во манастир или во Ирак, Иран или во Саудиска Арабија? Кај се видело костими за капење да се облечат дури откога ќе заврши изборот? Круната за победничката беше ставена погрешно, односно на придружничката. Лентите како оние за венци за погреб, со фломастер напишани и ништо не се гледа на нив. Водителот под секоја критика и на крај ја повика мисицата од минатата година да и ја стави круната на победничката, а круната веќе ставена. Простор за движење околу шанкот, само две девојки знаеја што треба да прават. Победничката само два месеци претходно во Охрид на изборот за Мис лето не успеа ни во првите десет да влезе. Срамота ако ова е официјалниот избор за Мис на Македонија, навистина под секое ниво и голема срамота за државава. Се трудиме тоа максимално професионално да го направиме, онолку колку условите ни дозволуваат. Кандидатките два месеци се тренирани да се покажат како треба на финалето, обезбедена е гардеробата за девојките (само чевлите што беа исти за сите не чинеа 1.500 евра), обезбедивме награди во вредност од преку 95.000 евра. Изборот на Мис на Македонија за Мис на светот треба да биде двојно подобар од нашиот, а не оваа мизерија што се случи. Мислам дека треба гласно да се прозбори и напише за мизеријата наречена Мис на Македонија за Мис на Светот, не само да се плука, туку да се пренесе тоа што се случи. И некако веќе да се застане на крај на самоволието на Лидија Велковска да престане да не срамоти сите нас кои максимално професионално си ја работиме оваа исклучително тешка и комплексна работа и ја претставуваме татковината ширум светот – вели Мики Црнокрак.

Избор на Мис на Косово

Сопственичката на лиценцата за овој избор Велковска, вели дека овојпат изборот бил направен преку кастинзи на кои биле одбрани 12 финалистки.

-На кастинзи беа одбрани финалистките, а потоа правевме жирирање од затворен тип како секаде во светот без публика. Жирито имаше прилика да се запознае и да ги види девојките, да направи интервју со секоја и да остварат непосреден контакт. Потоа требаше само да се одбере вистинската која ќе ја понесе круната. Не правевме класичен избор со дефиле, ова беше замислено само како забава за млади. Не сакаме да правиме гламурозни забави, зашто ако нема услови за гламурозен избор. Сезонава сведоци сме дека се одржаа милион избори и сите беа на ниско ниво. Се злоупотребуваа девојките да шетаат по зачадени локали, на непристојни места, со импровизирани писти за ситна заработувачка – вели Велковска.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.