Партиите блиску до решение, најавената оставка на Давитковски изврши притисок?

Откако денеска претседателот на Комисијата за расчистување на настаните од 24 декември во Собранието, Борче Давитковски, најавиповлекување од тоа место поради непоместување на позициите од власта и опозицијата во однос на позициите кон заклучоците и препораките изработени од Давитковски, тој, сепак, остави простор, доколку се најде решение меѓу двете страни, да го потпише документот. Според него, останува на партиите да се договорат без негово присуство.

– Не се сретнав со Давитковски заради обврски, се договоривме да се видиме следната недела, така што немам информации што се случува со Комисијата – посочува претседателот Иванов.

Според претседателот, неговите сознанија биле дека досега Комисијата добро функционирала, а сега ќе почека за претседателот на Комисијата изворно да го информира.

Со став за работите се изјасни и Фрчковски, член на Комисијата од опозицијата. Тој посочува дека се согласувале со извештајот, но дека ВМРО-ДПМНЕ имала забелешки во делот на уставната димензија околу отстранувањето на пратениците и на новинарите од салата. И Фрчковски посочува дека сега е момент кога лидерството на двете партии треба да се договори, но и дека е потребен притисок од европските претставници.

Со свој став, според најавите, наскоро ќе излезе и ВМРО-ДПМНЕ.

Неофицијално, течат консултации и договори меѓу двете најголеми партии, кои, повторно неофицијално, биле блиску до решение.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.