Мицкоски: Со денешниот протест почнуваме сеопшта револуција против владеењето на Заев

Одговорајќи на новинарски прашања по средбата со претседателот на Стопанската комора на Македонија Бранко Азески, Мицкоски напомена дека протестот е вид пркос и манифестација на се она што ги тишти граѓаните и ќе продолжи, не само во Скопје, туку и во други градови низ Македонија.

Според него, 28 ноември има симболика за ВМРО-ДПМНЕ и за целокупното, како што наведе, црно владеење на Заев.

-Тоа е денот кога беше направен упад во правниот систем на Македонија, кога вицепремиерот и министер за внатрешни Оливер Спасовски по налог на Заев, без да им биде симнат имунитетот на пратениците, со лисици на рацете правеше спектакли во јавноста и прогласи дел од тие луѓе за терористи и насилници. Денеска гледаме дека дел од тие се луѓе кои имале европски карактер. Ги поканувам сите граѓани кои сакаат да им застанат на патот на СДСМ и на Заев во ова национално разнебитување, економско разнебитување и разнебитување по која било основа и погрешно владеење, да ни се придружат, да застанат рамо до рамо со нас, да ја поченеме оваа напа сеопфатна и сеопшат револуција, рече Мицкоски.

На прашањето дали е можно помирување со селективна амнестија, порача дека одговор треба да даде нејзиниот предлагач.

– Предложивме закон за амнестија, видовте како заврши иако кажавме дека сме подготвени да се моделира ако постоше чесна намера од другата страна. Ќе го повторам и вториот дел од ставот, дека доколку кое било законско решение нуди одговор на овој политички прогон што и се случува на ВМРО-ДПМНЕ како политичка партија, на нејзини поранешни и сегашни функционери, ВМРО-ДПМНЕ ќе го поддржи, подвлече Мицкоски.

Во врска со средбата на Тодоров и Јанчев со премиерот Заев во Струмица, Мицкоски рече дека разбрал од медиумите, но не смета дека тоа ќе влијае на компактноста на пратеничката група на ВМРО-ДПМНЕ.

– Не гледам причина зошто пратеничката група да не биде компактна или да не ги застапува ставовите на ВМРО-ДПМНЕ, програмата врз основа на која биле избрани, конгресните резолуции, одлуките на централниот и извршниот комитет. Јас сум сигурен во тоа. Разбрав од медиумите дека имало средба, разбрав за содржината на тој состанок. Навистина не ги знам ниту мотивите, ниту зошто имале потреба од таква средба и што било разговарано. Можеби тие треба да дадат одговор. Верувам и сигурен сум во честитоста на пратениците и пратеничката група, но и на сите луѓе кои се дел од стѕруктурите на ВМРО-ДПМНЕ, потенцира Мицкоски.

Порача и дека во Македонија мора да почне да се води принципиелна, чесна, искрена и, како што истакна, честита политика. – Само така ќе можеме пред граѓаните да се легитимираме како совесни политичари кои ќе обезбедат подобра иднина, дополни Мицкоски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.