СДСМ го користи политичкиот прогон врз Никола Груевски и за хајка и притисок против ВМРО-ДПМНЕ

ВМРО-ДПМНЕ е цел на политички прогон од страна на властa која лажно се преставува за проевропска, а применува најтоталитарни методи. Зоран Заев и СДСМ вчера се обидоа да ја убијат демократијата и слободната мисла. Власта покажа полициска бруталност и насилие од страв за сопствените грешки и неуспеси, реагираат од ВМРО-ДПМНЕ по синоќешните настани.

– Додека убиецот на Мартин Јанушев и по една година сеуште на слобода, а убиецот на младиот Саздо сеуште е непознат и никој не трага по нив, власта се занимава со политички монтировки. Откако СДСМ е на власт имаме вкупно девет нерасчистени убиства, за кои никој не презема одговорност. Полицијата не се справува со вистинските криминалци кои демнат по улиците и се потенцијална опасност за секој еден граѓанин, бидејќи е зафатена со реализација на партиските нарачки за политички прогон.

– СДСМ го користи политичкиот прогон врз Никола Груевски и за хајка и притисок против ВМРО-ДПМНЕ. Никаде во модерна Европа, ниту во светот е забележано полициски сили да опседнуваат седиште на опозиција, да проверуваат и претресуваат партиски активисти со апсурдни образложенија, за да ја замолкнат критичката и слободна мисла, која се повеќе е изразена. Целта е да се заплаши секој граѓанин кој размислува поинаку од капитулантската влада на Зоран Заев. Власта ја промаши целта, ниту некој е заплашен, ниту потиштен.

– ВМРО-ДПМНЕ е посилно и помотивирано да се бори против сите кои ја погазија демократијата и владеењето на правото во Република Македонија. Насилниците врз правото и правдата за целиот политички прогон кој го режираат ќе одговараат со враќањето на правната држава и демократијата, стои во соопштението ДПМНЕ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.