Се наплатувале до 5 000 евра за пасош – Под истрага Државна агенција за Бугарите во странство

Специјалното обвинителство ја истражува бугарската Државна агенција за Бугарите во странство поради сомнеж за корупција. Истражителите од утринава испитуваат сведоци во Софија, Ќустендил и во Плевен, пренесуваат бугарските медиуми.

Истрагата започнала по обвинувањата дека се издавале документи со кои се докажува бугарско потекло за 5000 евра, а такви фалсификувани документи им биле издавани на луѓе од Македонија, Украина и од Молдавија. Со тие документи потоа можеле да извадат бугарски пасош.

Во обвинителството задржан бил претседателот на агенцијата, Петар Харалампиев, кој е испитуван за продажба на неверодостојни документи за бугарското потекло на граѓани, главно од Украина, Молдавија и Македонија за сума од 5.000 евра по пасош.

Инаку Харалампиев ја преземал Агенцијата минатата година. Пред тоа, три години бил заменик овластен управник на Софија како и извршен директор и член на управниот совет на фондацијата „Бугари“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.